جو قوتیں میاں جی کواقتدارمیں لائیں،ان پرخداکاغضب ہو،جاویدہاشمی

لاہور…پاکستان تحریک انصاف کے صدر جاوید ہاشمی کا کہنا ہے کہ جوقوتیں نوازشریف کو اقتدار میں لائی ہیں ان سے کہتا ہوں کہ خدا کا خوف کریں۔لاہورمیں عیدملن پارٹی سے خطاب کرتے ہوئے جاوید ہاشمی نے کہا کہ نوازشریف کو عوام اقتدار میں نہیں لائے،ن لیگ والوں کو ووٹ ملیں نہ ملیں وہ سیٹیں بنا لیتے ہیں ، تحریک انصاف کو ووٹ ملتے ہیں لیکن سیٹیں نہیں بنانے دی جاتیں۔ انہوں نے کہا کہ جو قوتیں میاں جی کواقتدارمیں لائی ہیں،ان پرخداکاغضب ہو۔جاوید ہاشمی کا کہناتھاکہ پاکستان لٹ چکا ہے ، اب بچھا کچھا بھی لوٹ لیا گیا ہے ، کوئی نہیں پوچھ رہا کہ بجلی کمپنیوں کو 500ارب روپے کس مدسے دیے گئے ہیں۔جاوید ہاشمی نے کہا کہ حکمران بلدیاتی الیکشن نہیں کرانا چاہتے تھے ، سپریم کورٹ کے حکم پر ٹوٹی پھوٹی قانون سازی کرکے اقتدار اپنے ہاتھ میں رکھنا چاہتے ہیں ، پچھلی اسمبلی بیمار تھی جبکہ موجودہ اسمبلی مردہ ہے۔ جاوید ہاشمی کی تقریرجاری تھی کہ کارکنوں نے کھانے پر دھاوا بول دیا ، اسی دوران جاوید ہاشمی کا موبائل فون بھی گم ہوگیا ۔اعلانات بھی ہوئے لیکن موبائل کا کچھ پتہ نہ چل سکا۔